„მწვანე ბარათის“ ლატარია დროებით შეჩერდა

ამერიკის შეერთებული შტატების პრეზიდენტმა, დონალდ ტრამპმა, გადაწყვეტილება მიიღო „მწვანე ბარათის“ ლატარიის (Diversity Visa Program) დროებით შეჩერების შესახებ. აღნიშნული გადაწყვეტილება, ამერიკული მედიის ცნობით, უკავშირდება უსაფრთხოების საკითხებს და ბოლო პერიოდში განვითარებულ მძიმე მოვლენებს.

გავრცელებული ინფორმაციით, შეჩერების ერთ-ერთ მიზეზად სახელდება ბრაუნის უნივერსიტეტში მომხდარი სროლა და მასთან დაკავშირებული გამოძიება, ასევე მასაჩუსეტსის ტექნოლოგიური ინსტიტუტის (MIT) პროფესორის მკვლელობის საქმე. გამოძიების ფარგლებში დადგინდა ეჭვმიტანილის ვინაობა – 48 წლის ნევეს ვალენტე, რომელიც წლების წინ აშშ-ში სწორედ „მწვანე ბარათის“ პროგრამის მეშვეობით მოხვდა. ამერიკული მედიის ცნობით, იგი მოგვიანებით გარდაცვლილი იპოვეს.

ქვემოთ მოცემულია იაფი ავიაბილეთების ცხრილი თბილისი – ნიუ იორკის მიმართულებით

„მწვანე ბარათის“ ლატარიის დაპაუზების პარალელურად, აშშ-ის საშინაო უსაფრთხოების დეპარტამენტის ხელმძღვანელმა, კრისტი ნოემმა, პრეზიდენტისგან მიიღო ოფიციალური განკარგულება, რომლის მიხედვითაც შემდგომი მითითების მიღებამდე მნიშვნელოვნად იზღუდება იმიგრანტთა ავტორიზაციის პროცესიც. ტრამპის ადმინისტრაციაში განმარტავენ, რომ აღნიშნული ნაბიჯი მიზნად ისახავს ქვეყნის შიდა უსაფრთხოების გაძლიერებას და იმიგრაციული პროცესების დამატებით კონტროლს.

ცნობისთვის, „მწვანე ბარათის“ ლატარია ყოველწლიურად ტარდება და აშშ-ში მუდმივი ცხოვრების უფლების მიღების შესაძლებლობას დაახლოებით 50 000 ადამიანს აძლევს. პროგრამა განსაკუთრებით პოპულარულია იმ ქვეყნების მოქალაქეებს შორის, საიდანაც ამერიკაში ემიგრაციის მაჩვენებელი შედარებით დაბალია. მხოლოდ 2025 წელს ლატარიაში მონაწილეობისთვის განაცხადი 20 მილიონზე მეტმა ადამიანმა შეავსო.

ამ ეტაპზე უცნობია, რამდენ ხანს გაგრძელდება პროგრამის შეჩერება და შეეხება თუ არა ცვლილებები უკვე შერჩეულ ან მიმდინარე განაცხადებს. დამატებითი ოფიციალური განმარტებების გამოქვეყნების შემთხვევაში, ინფორმაცია განახლდება.