Aegean Airlines ათენი – ბაღდადის პირდაპირ რეისებს იწყებს

ევროპის ერთ-ერთი ყველაზე წარმატებული და დინამიური ავიაკომპანია Aegean Airlines ახლო აღმოსავლეთის მიმართულებით მნიშვნელოვნად აფართოებს საკუთარ ქსელს — ავიაკომპანია იწყებს პირდაპირ ფრენებს ათენიდან ბაღდადის მიმართულებით. ეს გადაწყვეტილება ავიაციის ინდუსტრიაში უპრეცედენტოდ ითვლება, რადგან ერაყის დედაქალაქი მრავალი წლის განმავლობაში თითქმის საერთოდ არ ფიგურირებდა ევროპის კომერციული ავიამიმოსვლის რუკაზე.

ახალი მიმართულება ქმნის რეალურ შესაძლებლობას ბიზნეს სექტორის, საერთაშორისო ორგანიზაციების, დიპლომატიური მისიების, განვითარების სააგენტოებისა და დიასპორის მოგზაურთათვის, რომლებიც ამ მიმართულებას აქტიურად იყენებენ. პირდაპირი ფრენა ბაღდადამდე მნიშვნელოვნად ამცირებს მოგზაურობის დროს, ამარტივებს გადაადგილებას და ხელს უწყობს თანამშრომლობისა და ეკონომიკური ურთიერთობების გაღრმავებას.

ათენი-ბაღდადის პირველი რეისი 16 დეკემბერს არის დაგეგმილი.

Aegean Airlines კვლავ განაგრძობს საკუთარი ქსელისა და გავლენის ზრდას რეგიონში. ათენი კიდევ უფრო ძლიერ სატრანზიტო კვანძად ყალიბდება სამხრეთ-აღმოსავლეთ ევროპაში, საიდანაც შესაძლებელია კომფორტული წვდომა ახლო აღმოსავლეთის ქვეყნებზე, ახლა უკვე — ბაღდადზეც.

ეს ცვლილება კარგად აჩვენებს ავიაციის ბაზრის დინამიკას – დღეს ავიაკომპანიები არა მხოლოდ პოპულარულ ტურისტულ ქალაქებზე აკეთებენ აქცენტს, არამედ სრულიად ახალი, სტრატეგიული მიმართულებების განვითარებაზეც.

ამასთანავე, ერაყი აქტიურად მუშაობს ბაღდადის საერთაშორისო აეროპორტის ინფრასტრუქტურის განახლებაზე. ცოტა ხნის წინ გაფორმდა 764 მილიონი აშშ დოლარის ღირებულების კონტრაქტი საერთაშორისო კონსორციუმთან, რომელშიც შედის ლუქსემბურგის ოპერატორი Corporacion America Airport და ადგილობრივი საინვესტიციო კომპანია Amwaj International.

ქვემოთ მოცემულია იაფი ავიაბილეთების ცხრილი თბილისიდან ათენის მიმართულებით, რომელსაც ასრულებს Aegean Airlines